Trampın yeni FED tənqidi: O, faiz dərəcələrini məndən az bilir

0

ABŞ Prezidenti Donald Trump, vəzifəyə gəlməsinin 100-cü gününü qeyd etmək məqsədilə çərşənbə axşamı Detroit şəhəri yaxınlığında keçirilən mitinqdə çıxış edib. BBN.az xəbər verir ki, Trump çıxışı zamanı iqtisadi siyasətini və gömrük tarifləri rejimini müdafiə edib, ABŞ Federal Ehtiyat Sisteminin (Fed) sədri Jerome Powell-ı tənqid etməkdən çəkinməyib.

BBN.az xəbər verir ki, Prezident Powell-ı “öz işini yaxşı bacarmayan biri” adlandırsa da, inflyasiya və faiz dərəcələrinin azaldığını bildirib. Qeyd edək ki, Trump bu ayın əvvəlində də Fed-in faiz endirimləri siyasətinin sürətinə dair narazılığını ifadə etmiş, lakin Powell-ı vəzifədən almaq niyyətində olmadığını bəyan etmişdi.

Həmin dövrdə Fed rəhbərinin gələcəyi ilə bağlı qeyri-müəyyənlik bazarlarda dalğalanmalara səbəb olmuş, investorlar isə Trump-ın gömrük tarifləri planlarına dair narahatlıqlarını artırmışdı.

“Əslində Fed-i tənqid etməmək və işini görməsinə imkan vermək lazımdır. Amma faiz dərəcələri barədə ondan qat-qat artıq bilgim var”, – deyə ABŞ Prezidenti qeyd edib.

Son sorğular seçicilərin iqtisadi gündəmlə bağlı narahatlığını, xüsusilə də gömrük tariflərinin resessiya və inflyasiyaya səbəb ola biləcəyi ehtimalını önə çıxarır. ABŞ-da dünən açıqlanan Aprel ayına dair Conference Board istehlakçı etimadı indeksi də son beş ilin ən aşağı səviyyəsinə enib.

Trump isə sorğuların qərəzli olduğunu bildirərək, tətbiq edilən tariflərin yaxınlaşan vergi islahatının xərclərini balanslaşdırmaq üçün vacib addım olduğunu vurğulayıb.