Virus qlobal turizmə 22 milyardlıq zərər vura bilər

Koronavirus epidemiyası turizm iqtisadiyyatına 22 milyard dollardan artıq zərər vuracaq. Bu açıqlamanı Dünya Turizm və Səyahətlər Şurasının (WTTC) sədri Gloria Guevara verib. 2800-dən çox insanın ölümü ilə nəticələnən bu virusun yayılması ilə aviaşirkətlər vasitəsilə həyata keçirilən uçuşların sayında azalma müşahidə olunub.

Qeyd edək ki, WTTC tərəfindən aparılan bu hesablamada “SARS” və “H1N1” kimi virusların yayılması nəticəsində ortaya çıxan statistikadan istifadə olunub və turizmə ən çox zərər vuracaq faktorun Çin əsilli turistlərin sayında müşahidə edilən kəskin azalma olduğu aşkarlanıb.

Bununla yanaşı, daha pessimistik ssenari müşahidə olunduqda, yəni “COVID-19” epidemiyası “SARS” epidemiyası (Noyabr 2002- İyul 2003) kimi uzunmüddətli olduqda ümumi turizmə dəyəcək zərərin iki dəfədən çox artaraq 50 milyard dollara çatacağı ehtimal edilir. “Oxford Economics” isə bu rəqəmin 73 milyardı ötə biləcəyini də bildirib.