Yaponiya 1 trilyon dollarlıq tədbirlər paketini başladır

Yaponiyanın Baş Naziri Şinzo Abe ölkə iqtisadiyyatının koronavirusun mənfi təsirlərinə qarşı dayanıqlılığının artırmaq üçün 108 trilyon yen (989 milyard dollar) həcmində stimullaşdırıcı tədbirlər paketini açıqlayıb.

Yaponiya ÜDM-nin təqribi 20%-inə bərabər olan bu tədbirlər paketi özündə ev təsərrüfatları və kiçik bizneslərə 6 trilyon yen həcmində maliyyə vəsaiti ayrılmasını ehtiva edir. Həmçinin, biznes vergilərinin ertələnməsi və sosial xidmət xərclərinin kompensasiya edilməsi üçün 26 trilyon yen ayrılıb.

Tədbirlər planı ilk növbədə iş yerlərinin itirilməsi və şirkətlərin müflisləşməsini dayandırmağa yönələcək. İkinci hissə isə koronavirus pandemiyası tam nəzarət altına alındıqdan sonra işə başlayacaq və iqtisadiyyatın sürətli şəkildə bərpasına sərf ediləcək.

Tədbirlər planında həmçinin cari il ərzində 2 milyona yaxın ölkə vətəndaşına virus əleyhinə “Avigan” preparatlarının paylanması da qeyd olunub.

Tədbirlər planının digər detalları və göstəricilərinin müzakirələri davam edir.