Dünya Bankının təşkilatçılığı ilə keçirilən “Azərbaycan üzrə Dövri İqtisadi Hesabat”ın təqdimat mərasimi çərçivəsində “Azərbaycanda özəl investisiyaların canlandırılması: Nə edilməlidir?” mövzusunda panel müzakirəsi baş tutub. Panelə Dünya Bankının baş iqtisadçısı Migel Sançes moderatorluq edib.
Azərbaycan Banklar Assosiasiyasının prezidenti Zakir Nuriyev çıxışında bildirib ki, Azərbaycanda biznes mühitinin təkmilləşdirilməsi və sahibkarların maliyyə resurslarına çıxış imkanlarının artırılması istiqamətində ardıcıl və koordinasiyalı tədbirlər həyata keçirilir.
O qeyd edib ki, “Biznes mühiti və beynəlxalq reytinqlər üzrə Komissiya” nəzdində fəaliyyət göstərən “Maliyyə bazarlarının inkişafı və kreditlərin əlçatanlığı” işçi qrupu, eləcə də İqtisadi Şura çərçivəsində yaradılmış “Sahibkarlıq fəaliyyətinə maneələrin aradan qaldırılması” işçi qrupu bu istiqamətdə mühüm rol oynayır.
“Bu təşəbbüslər həm banklar, həm də sahibkarlar üçün qarşılıqlı etimad və şəffaflıq mühitini gücləndirir”, – deyə Zakir Nuriyev vurğulayıb.
Azərbaycan Banklar Assosiasiyasında həmçinin yeni PR strategiyası hazırlanıb ki, bu strategiya bank sektorunun reputasiyasını möhkəmləndirməyə, etimadı artırmağa və kommunikasiya fəaliyyətini daha sistemli əsasda qurmağa xidmət edir.
