ABŞ-da xam neft ehtiyatları azalıb

ABŞ Enerji İnformasiya İdarəsi ötən həftənin statistikasını özündə cəmləşdirən həftəlik hesabat yayınlayıb. Hesabata görə, ölkədəki xam neft ehtiyatları həftə ərzində 400 min barel azalaraq 426.5 milyon barelə düşüb. Bu isə 0.1% azalma deməkdir. Proqnozlar isə ehtiyatların 2.2 milyon barel artması yönündə idi. Qeyd edək ki, bir öncəki həftə xam neft ehtiyatları 0.8 milyon barel artıb.

Digər tərəfdən isə, ABŞ-ın ticarət üçün nəzərdə tutulmayan strateji xam neft ehtiyatları 1.7 milyon barel (0.3%) azalıb. Benzin ehtiyatları isə 5.4 milyon barel azalaraq 217.7 milyon barelə çatıb.

Gündəlik xam neft idxalı 169 min barel azalmaqla 5.825 milyon barel olub. Gündəlik xam neft ixracı isə əksinə 546 min barel artaraq 3.6 milyon barelə çatıb. Xam neft hasilatı göstəriciləri isə 122 min barel azalıb və gündəlik 11.73 milyon barel səviyyəsində qərarlaşıb. Gələn il isə bu göstəricinin 11.7 milyon barel civarında olması proqnozlaşdırılır.