“Fitch Ratings” SOCAR-ın gəlirlərinin artacağını proqnozlaşdırıb

Beynəlxalq reytinq agentliyi “Fitch Ratings” Azərbaycan Respublikası Dövlət Neft Şirkətinin (SOCAR) Müstəqil Kredit Profilini (SCP) BB+/Stabil səviyyəsində qiymətləndirib. Bu barədə, agentliyin rəsmi səhifəsində yerləşdirilən hesabatda qeyd edilib.

Hesabata istinadən, şirkətin gündəlik neft hasilatının 277 min barel olması və 12 illik dayanıqlı neft ehtiyatları bazasının olması nəzərə alınıb. Şirkətin qarşısında duran yeganə məhdudlaşdırıcı amil kimi isə, borc yükünün şirkət kapitalına nisbətinin (leverec) yüksək olması göstərilib. Bu isə, spesifik olaraq 2020-ci ildə koronavirus pandemiyasının sürətlə yayılması səbəbindən neftə olan tələbin və əlaqədar olaraq neft qiymətlərinin aşağı səviyyələrdə dövr etməsi ilə əlaqələndirilib.

Hazırda, bir sıra ölkələrin iqtisadiyyatlarının dirçəlməsi ilə neftə tələbatın artması, eləcə də xam neft və yanacaq qiymətləri ilə bağlı proqnozların müsbət yöndə olmasına əsasən, “Fitch Ratings” SOCAR-ın yaxın gələcəkdə gəlirlərinin artacağını proqnozlaşdırıb.