Ötən il Azərbaycan Mərkəzi Bankı (AMB) valyuta bazarında satılmayan 541 milyon ABŞ dollarını Maliyyə Nazirliyinə transfer edib.
BBN.az xəbər verir ki, bu barədə AMB-nin sədri Taleh Kazımov faiz dəhlizinin parametrlərinə dair keçirilən mətbuat konfransında məlumat verib.
Sədr bildirib ki, xarici valyutada olan vəsaitin bir hissəsi manata çevrilmədən birbaşa Maliyyə Nazirliyinə köçürülüb:
“Növbəti aylarda tələb yarandığı təqdirdə həmin vəsaiti valyuta bazarında istifadə edəcəyik. Əhali isə yenə də daha çox valyuta satıb, nəinki alıb. Transfer məbləğini nəzərə alsaq, təxminən 400-450 milyon dollar az satılıb. Çünki tələb yoxdur”, – deyə o qeyd edib.
T. Kazımov vurğulayıb ki, yanvar ayında da valyuta bazarında xüsusi artım qeydə alınmayıb. Təxminən 300-350 milyon dollar satış həyata keçirilib, halbuki plana əsasən 700 milyon dollara yaxın satış nəzərdə tutulurdu.
AMB sədri əlavə edib ki, nağd əməliyyatlar üzrə də son 3-4 ilin ən aşağı göstəricisi qeydə alınıb. Belə ki, yanvarda 18 milyon ABŞ dolları mənfi saldo formalaşıb – yəni əhali aldıqlarından 18 milyon dollar çox valyuta satıb.
Onun sözlərinə görə, hazırda valyuta bazarında sabitlik qorunur və hər hansı risk müşahidə edilmir.
