Azərbaycan Mərkəzi Bankı tərəfindən maliyyə xidmətləri sahəsində vətəndaş hüquqlarının qorunması və xidmət səviyyəsinin yüksəldilməsi məqsədilə mayın 13-də Siyəzən rayonunda növbəti səyyar qəbul təşkil olunub.
Qəbul zamanı Mərkəzi Bankın nümayəndələri vətəndaşların müraciətlərinə baxaraq onlara qanunvericiliyə uyğun addımlarla bağlı müvafiq izahatlar veriblər.
Səyyar qəbul zamanı vətəndaşlar əsasən kredit istəyi, kredit öhdəlikləri üzrə güzəştlər, ATM quraşdırılması, kredit tarixçəsi məlumatlarının düzgün yerləşdirilməməsi və digər məsələlərlə bağlı müraciətlər ünvanlayıblar.
Müraciətlərin bir hissəsi yerində həll olunub, əlavə araşdırma tələb edən məsələlər isə aidiyyəti üzrə qeydiyyata alınaraq icraya götürülüb.
Qeyd olunub ki, vətəndaşlar səyyar qəbullarla bağlı əlavə sual, təklif və müraciətlərini Mərkəzi Bankın elektron müraciət sistemi vasitəsilə göndərə və ya “966” Çağrı Mərkəzi ilə əlaqə saxlayaraq ətraflı məlumat əldə edə bilərlər.
