Azərbaycanın uzunmüddətli iqtisadi artımı və yeni iş yerlərinin yaradılması getdikcə daha çox qeyri-neft sektorunun, xüsusilə də turizmin inkişafı ilə bağlı olacaq.
BBN.az xəbər verir ki, bunu Dünya Bankının Cənubi Qafqaz üzrə regional direktoru Rolande Prays Bakıda keçirilən “İqtisadi artımı və diversifikasiyanı təmin etmək üçün Azərbaycanın turizm potensialının açılması” adlı tədbirdə bildirib.
Onun sözlərinə görə, ölkə son illərdə güclü makroiqtisadi idarəetmə, möhkəm fiskal ehtiyatlar və düşünülmüş dövlət siyasəti sayəsində xarici iqtisadi şoklara qarşı dayanıqlılığını qoruyub: “Karbohidrogen hasilatının tədricən azalması fonunda davamlı iqtisadi artımın təmin edilməsi və yüksək keyfiyyətli məşğulluğun yaradılması üçün qeyri-neft sektorunun rolu artacaq. Bu baxımdan, turizm iqtisadi artımın sürətləndirilməsi və iqtisadiyyatın şaxələndirilməsi üçün ən böyük potensiala malik sahələrdən biri kimi qiymətləndirilir. 2025-ci ildə Azərbaycanda iqtisadi artım neft hasilatının azalmasının davam etməsi və qeyri-neft sektorunda artım tempinin zəifləməsi səbəbindən 1,4 % təşkil edib”.
