Dünya bazarlarında qızılın qiyməti həftəni enişlə başa vurmağa hazırlaşır. Neft qiymətlərinin kəskin artması fonunda inflyasiya gözləntilərinin yüksəlməsi və ABŞ dollarının möhkəmlənməsi qızıla olan tələbi zəiflədib. Reuters-in məlumatına görə, investorlar mərkəzi bankların yüksək inflyasiya ilə mübarizə üçün faiz dərəcələrini daha uzun müddət yüksək saxlayacağını proqnozlaşdırır ki, bu da faiz gətirməyən qızılın cəlbediciliyini azaldır. Hazırda spot qızılın qiyməti həftəlik bazada dəyər itirərək son dövrlərin ən aşağı səviyyələrinə yaxınlaşıb. Ekspertlər qeyd edir ki, Yaxın Şərqdəki gərginlik enerji daşıyıcılarını bahalaşdırdıqca, bu amil qlobal maliyyə bazarlarında qızılın “təhlükəsiz liman” statusundan daha çox, dolların güclənməsi faktorunu ön plana çıxarır.
