Beynəlxalq bazarlarda qızılın qiyməti ABŞ ilə İran arasındakı hərbi gərginliyin artması və ABŞ Federal Ehtiyat Sisteminin (Fed) iyun ayı iclasının protokolları ilə bağlı gözləntilərin fonunda tarazlığını qoruyur.
Ötən ticarət sessiyasında kəskin ucuzlaşan qızıl, Yaxın Şərqdə yenidən alovlanan gərginliyin neft qiymətlərini sıçratması və enerji qiymətləri ilə dəstəklənən inflyasiya narahatlıqlarını yenidən gündəmə gətirməsi ilə bir qədər sabitləşib. ABŞ-ın İranın Hörmüz boğazındakı gəmilərə hücumuna cavab olaraq İran ərazisinə yeni zərbələr endirməsi və Tehranın neft ixracı üçün verilmiş icazələri ləğv etməsi iki ölkə arasında iyun ayında əldə edilmiş çərçivə sazişinin gələcəyi ilə bağlı suallar doğurub. Vaşinqton danışıqların davam etdiyinə işarə versə də, geosiyasi risklər dolların bahalaşmasına və investorların qızıl kimi etibarlı limanlara yönəlməsinə səbəb olur.
Geosiyasi gərginliklə yanaşı, bazarların diqqəti bu gün açıqlanacaq Fed-in iyun ayı iclasının protokollarına yönəlib. Fed-in pul siyasəti ilə bağlı siqnalları iyun ayının ortalarından bəri qızıl bazarının əsas hərəkətverici qüvvəsi olaraq qalır. Fed-in iyun iclasında nümayiş etdirdiyi şahin (sərt) mövqe və bir çox siyasətçinin faiz dərəcələrinin daha da artırılması ideyasını dəstəkləməsi, gəlir gətirməyən aktivlər üçün mənfi təsir göstərir. İnvestorlar indi Fed-in gələcək addımları haqqında daha aydın ipucları əldə etmək üçün protokolları və yeni sədr Kevin Warshın kommunikasiya üslubunu yaxından izləyirlər.
