Qlobal maliyyə bazarlarında sülh gözləntiləri yerini yenidən gərginliyə buraxıb. ABŞ və İran arasında Hörmüz boğazının açılması istiqamətində danışıqların müsbət yekunlaşacağına dair nikbinlik mövcud ikən, ABŞ ordusunun İranın cənubundakı raket buraxılış məntəqələrinə və mina döşəyən gəmilərinə qəfil hava zərbələri endirməsi hər şeyi dəyişib. Bu hərbi gərginlikdən sonra qara qızılın qiyməti kəskin bahalaşıb, Brent markalı neft 2%-ə yaxın dəyər qazanıb. Enerji daşıyıcılarının bahalaşması fonunda qlobal inflyasiya qorxularının yenidən alovlanması və mərkəzi bankların sərt pul-kredit siyasətini davam etdirəcəyi ehtimalı isə qızıl bazarına ağır zərbə vurub. Asiya birjalarında spot qızılın qiyməti 0,8% ucuzlaşaraq unsiya üçün 4535 dollara geriləyib, gümüş isə 2%-dən çox dəyər itirib. Ekspertlər Yaxın Şərqdəki bu gözlənilməz gərginliyin dolları gücləndirdiyini və qısamüddətli perspektivdə qiymətli metalların üzərindəki təzyiqi artıracağını bildirirlər.
#BBN #BBNaz #Qızıl #Neft #ABŞ #İran #Maliyyə #İqtisadiyyat #Birja #QlobalBöhran #YaxınŞərq
