Asiya birjalarında həftənin ilk ticarət günündə neft qiymətlərində kəskin azalma qeydə alınıb. Buna əsas səbəb ABŞ və İran arasında gərginliyin azaldılması və potensial sülh sazişinə dair ümidlərin artması olub. İyul ayı üçün “Brent” markalı neftin fyuçersləri təxminən 5%-ə yaxın dəyər itirərək son üç həftənin ən aşağı səviyyəsinə — bir barel üçün 98,12 dollara geriləyib. Eyni zamanda, “WTI” (West Texas Intermediate) markalı neftin qiyməti də 5,2% azalaraq 91,31 dollara düşüb.
Bazardakı bu kəskin dalğalanma ABŞ Prezidenti Donald Trampın həftəsonu verdiyi bəyanatlarla birbaşa bağlıdır. Tramp tərəflər arasında xüsusilə qlobal neft axınının beşdə birinin keçdiyi strateji Hörmüz boğazının yenidən açılmasını hədəfləyən bir anlaşma memorandumunun böyük ölçüdə razılaşdırıldığını elan edib. Lakin rəsmi Tehranın dövlət mediası bu iddiaları təkzib edərək sazişin hələ tam hazır olmadığını bildirib. Bunun ardınca Tramp da tələsmədiklərini və rəsmi sənəd imzalanana qədər İrana qarşı dəniz blokadasının davam edəcəyini vurğulayıb. Tərəflər arasında İranın nüvə fəaliyyəti və zənginləşdirilmiş uran ehtiyatları kimi strateji mövzularda ciddi fikir ayrılıqları qalsa da, investorlar böyük bir tədarük böhranının qarşısının alına biləcəyinə inanaraq neft satışını sürətləndiriblər. Digər tərəfdən, Hörmüz boğazında hərəkətin hələ də məhdud olması qiymətlərin daha kəskin şəkildə ucuzlaşmasının qarşısını alan əsas amil kimi qalmaqdadır.
