2026-cı ildə Azərbaycanda dövlət büdcəsi hesabına maliyyələşdiriləcək məqsədli proqramlar üçün 4 milyard 173,5 milyon manat vəsait ayrılması planlaşdırılır.
BBN.az xəbər verir ki, bu barədə məlumat Hesablama Palatasının 2026-cı il dövlət büdcəsi haqqında qanun layihəsinə verdiyi rəyində əksini tapıb.
Sənədə əsasən, bu göstərici 2025-ci illə müqayisədə 2 milyard 479,6 milyon manat azdır. Ayrılacaq vəsaitin ən böyük hissəsi — 3 milyard 500 milyon manat (83,9 faiz) — “İşğaldan azad edilmiş ərazilərə Böyük Qayıdışa dair I Dövlət Proqramı”nın icrasına yönəldiləcək. Ən kiçik məbləğ — 100 min manat isə “Çayçılığın inkişafına dair 2018–2027-ci illər üçün Dövlət Proqramı”na ayrılacaq.
Hesablama Palatasının rəyinə görə, dövlət büdcəsinin xərcləri ilə bağlı təqdim olunan əlavələrdə 3 milyard 554,4 milyon manatlıq proqram vəsaiti ayrıca sətirlə göstərilib (2022–2026-cı illərdə sosial-iqtisadi inkişaf strategiyası üzrə tədbirlər istisna olmaqla). Qalan hissə isə icraçı qurumların saxlanma və digər xərc istiqamətləri hesabına maliyyələşdiriləcək.
