Kriptovalyuta bazarı yenidən “risk-on” rejiminə keçib. Dünyanın ən böyük rəqəmsal aktivi olan Bitcoin, son bir ayın ən yüksək səviyyəsini test edərək 74,000 dolların üzərinə yüksəlib. Hətta sessiya ərzində qısamüddətli olaraq 76,000 dollar həddini belə keçən Bitkoin, qlobal bazarlardakı ümumi nikbinliyi ən sürətli əks etdirən aktivə çevrilib.
Bu sıçrayışın arxasında dayanan iqtisadi drayverlər çoxşaxəlidir. Bir tərəfdən ABŞ və İran arasındakı gərginliyin azalması ehtimalı investorları daha riskli aktivlərə yönəldir, digər tərəfdən isə ABŞ-da istehsalçı inflyasiyasının (PPI) gözləniləndən aşağı gəlməsi “yumşaq eniş” ümidlərini artırır. Neft qiymətlərinin stabilləşməsi və dolların indeksinin (DXY) zəifləməsi Bitkoin üçün əlavə dəstək rolunu oynayır. Analitiklər qeyd edir ki, əgər Bitkoin günü 74,441 dollar səviyyəsindən yuxarıda bağlaya bilsə, növbəti hədəf 80,000 dollarlıq psixoloji baryer olacaq. Hazırkı mənzərə göstərir ki, kripto bazarı artıq təkcə spekulyativ bir sahə deyil, həm də qlobal makroiqtisadiyyatın ən həssas barometrinə çevrilib.
