Google Photos tətbiqinə süni intellekt əsaslı yeni “Video Remiks” funksiyası əlavə olunub.
BBN.az xəbər verir ki, yeni alət istifadəçilərə əlavə redaktə proqramlarına ehtiyac duymadan videolarını bir neçə toxunuşla fərqli üslublarda yenidən işləməyə imkan verir.
Tətbiqin “Yarat” (Create) bölməsində yerləşən “Video Remiks” funksiyası vasitəsilə videolara kinematik işıqlandırma əlavə etmək, fonu dəyişdirmək, eləcə də akvarel, eskiz və yağlı boya kimi müxtəlif bədii effektlər tətbiq etmək mümkündür. İstifadəçilər videolarına səhər işığı effekti də əlavə edə və onları fərqli məkanda çəkilmiş kimi göstərə bilərlər.
Şirkətin məlumatına görə, yeni funksiya “Gemini Omni” süni intellekt modeli əsasında hazırlanıb və əsas məqsəd peşəkar redaktə bacarığı olmadan yüksək keyfiyyətli video məzmunun hazırlanmasını asanlaşdırmaqdır.
“Google” bildirib ki, cəlbedici video məzmun yaratmaq üçün peşəkar biliklərə və ya uzun saatlar ərzində redaktə aparmağa ehtiyac olmamalıdır.
Hazırda “Video Remiks” funksiyası ABŞ, Argentina, Banqladeş, Braziliya, Kolumbiya, Misir, Hindistan, İndoneziya, Yaponiya, Meksika, Pakistan, Filippin, Cənubi Koreya və Türkiyədə “Google AI Plus”, Pro və Ultra abunəçiləri üçün mərhələli şəkildə istifadəyə verilir.
