Dünya valyuta birjalarında investorların diqqəti ABŞ və İran arasında gözlənilən kritik sülh danışıqlarına yönəlib. Bu həftə başa çatacaq atəşkəs müddətindən əvvəl tərəflərin razılığa gələ biləcəyi ümidi bazarlarda ehtiyatlı bir nikbinlik yaradıb. Bu gözləntilər fonunda ABŞ dolları digər əsas valyutalar qarşısında sabit mövqeyini qoruyur, investorlar isə növbəti böyük addımı atmaq üçün diplomatik kanallardan gələcək rəsmi xəbərləri gözləyirlər.
Yaponiyada isə vəziyyət fərqlidir; Yaponiya yeni dollar qarşısında zəifləməkdə davam edir. Yaponiya Bankının (BOJ) Yaxın Şərqdəki qeyri-müəyyənlikləri əsas gətirərək faiz artımını təxirə sala biləcəyi ilə bağlı yayılan məlumatlar milli valyutaya təzyiqi artırıb. Analitiklərin fikrincə, mərkəzi bankın bu ehtiyatlı mövqeyi yenanın psixoloji hədd olan 160 səviyyəsinə yaxınlaşmasına səbəb olub.
Digər tərəfdən, Yeni Zelandiya dolları ölkədə inflyasiyanın gözləniləndən yüksək olması səbəbindən digər valyutalardan müsbət mənada fərqlənərək dəyər qazanıb. Hazırda qlobal bazarlar “gözlə və gör” rejimindədir; həm Tehrandan gələn siqnallar, həm də mərkəzi bankların verəcəyi qərarlar yaxın 24 saat ərzində valyuta koridorlarının istiqamətini müəyyən edəcək.
