Azərbaycan hökuməti gələn ildən icmal büdcənin qeyri-neft baza kəsirini qeyri-neft ÜDM-ə nisbətdə ilk dəfə 19 faizə qədər azaltmağı bacarıb.
BBN.az xəbər verir ki, bu barədə maliyyə naziri Sahil Babayev Milli Məclisin İqtisadi siyasət, sənaye və sahibkarlıq komitəsində 2026-cı il dövlət büdcəsi layihəsinin müzakirəsi zamanı məlumat verib.
Nazirin sözlərinə görə, uzun illərdir bu göstərici 20 faizdən yuxarı olub, 2025-ci il üçün isə 22,4 faiz proqnozlaşdırılırdı. “2026-cı ildən etibarən ilk dəfə bu rəqəmi 19 faizə endirmək mümkün olub. Bu, həm ciddi, həm də önəmli bir dinamikanın göstəricisidir”, – deyə o vurğulayıb.
Sahil Babayev qeyd edib ki, bu proses hökumət üçün müəyyən çətinliklər yaratsa da, məqsəd fiskal sabitliyi gücləndirməkdir:
“Ortamüddətli dövrdə, yəni 2029-cu ilin sonuna qədər icmal büdcənin qeyri-neft baza kəsirinin qeyri-neft ÜDM-ə nisbətinin 13 faizə qədər endirilməsi planlaşdırılır. Bu addımlar ölkənin maliyyə dayanıqlığını və makroiqtisadi sabitliyini daha da möhkəmləndirəcək”.
Nazir həmçinin bildirib ki, büdcənin sağlamlığını təmin edən əsas amillərdən biri qeyri-neft gəlirlərinin artmasıdır. Onun sözlərinə görə, bu il dövlət büdcəsinin gəlirlərinin 57 faizi məhz qeyri-neft mənbələrindən formalaşacaq (ötən il bu göstərici 53–54 faiz idi). İcmal büdcə üzrə bu pay 63 faizə çatıb ki, bu da Azərbaycanın tarixində ilk dəfə qeyri-neft sektorunun bu qədər böyük paya malik olması deməkdir.
Sahil Babayev əlavə edib ki, orta müddətli perspektivdə hədəf qeyri-neft gəlirlərinin payını 69 faizə qədər yüksəltməkdir.
