2026-cı ildə Azərbaycanda dövlət büdcəsinə qeyri-neft-qaz sektorundan daxilolmaların cari xərclərin təxminən 88,1 faizini ödəyəcəyi proqnozlaşdırılır.
BBN.az xəbər verir ki, bu barədə maliyyə naziri Sahil Babayev Milli Məclisin İqtisadi siyasət, sənaye və sahibkarlıq komitəsində “2026-cı il dövlət büdcəsi haqqında” qanun layihəsinin təqdimatı zamanı məlumat verib.
Nazirin sözlərinə görə, növbəti il üçün cari xərclərin həcmi ümumi büdcə xərclərinin 60,3 faizi, yəni 25,2 milyard manat təşkil edəcək. Bu göstərici 2024-cü ilin faktiki nəticələri ilə müqayisədə 18 faiz çox, 2025-ci ilin proqnozu ilə müqayisədə isə 0,4 milyard manat artıqdır.
Sahil Babayev qeyd edib ki, Prezident İlham Əliyevin qarşıya qoyduğu əsas məqsədlərdən biri dövlətin cari xərclərinin qeyri-neft-qaz gəlirləri hesabına tam şəkildə maliyyələşdirilməsidir.
Nazir bildirib ki, “əgər gələn il bu nisbət 88 faizə çatırsa, 2029-cu ilə qədər bu göstəricinin 100 faizə yüksəlməsi hədəflənir.”
