26 dekabr – BBN.az
Cümə günü Asiya ticarət sessiyasında qızıl qiymətləri kəskin yüksələrək tarixi maksimum səviyyəyə çatıb. Buna səbəb qlobal qeyri-müəyyənlik fonunda investorların təhlükəsiz aktivlərə yönəlməsi və ABŞ Federal Ehtiyat Sisteminin (FED) faiz dərəcələrini daha da endirəcəyi ilə bağlı gözləntilərin güclənməsidir.
Reuters-in məlumatına görə, spot qızılın qiyməti 0,5% artaraq unsiya üçün 4 501,44 dollar olub. Sessiya ərzində qızılın qiyməti 4 530,60 dollar səviyyəsinə qalxaraq bütün dövrlərin rekordunu yeniləyib.
Analitiklər bildirir ki, ABŞ-da inflyasiyanın zəifləməsi və iqtisadi artımın yavaşlaması fonunda FED-in 2026-cı ildə əlavə faiz endirimlərinə gedəcəyi ehtimalları qızıl bazarına güclü dəstək verir. Eyni zamanda, geosiyasi risklər və maliyyə bazarlarında volatillik qızılı investorlar üçün əsas “təhlükəsiz liman” aktivinə çevirib.
Qeyd edək ki, faiz dərəcələrinin aşağı düşməsi gəlir gətirməyən aktiv olan qızıl üçün əlverişli mühit yaradır və bu da qiymətlərin yüksəlişini sürətləndirir.
