Azərbaycan Mərkəzi Bankının (AMB) lisenziyalaşdırdığı ödəniş bazarı iştirakçıları 2025-ci ilin əvvəlindən bu günə qədər ümumilikdə 38,8 milyard manat dəyərində əməliyyat həyata keçirib.
Bunu AMB-nin sədr müavini Vüsal Xəlilov Baku Fintech Forum 2025 çərçivəsində çıxışı zamanı bildirib.
Onun sözlərinə görə, bu göstərici ölkədə ödəniş sistemlərinin sürətli inkişafını əks etdirir:
“Bu, böyük rəqəmdir və artımın davam edəcəyini gözləyirik.”
AMB rəsmisi həmçinin qeyd edib ki, bu günə qədər 18 elektron pul təşkilatına və 8 ödəniş təşkilatına fəaliyyət üçün lisenziya verilib.
Qeyd edək ki, son illər Azərbaycanda fintex və rəqəmsal ödəniş ekosistemi dinamik şəkildə inkişaf edir, bu isə nağdsız ödənişlərin genişlənməsinə və maliyyə inklüzivliyinin artmasına töhfə verir.
Mənbə: Report.az
