İqtisadiyyat Nazirliyi tərəfindən təqdim olunan makroiqtisadi proqnozlara əsasən, 2026-cı ildə Azərbaycanda neft və qaz hasilatında azalma gözlənilir.
BBN.az xəbər verir ki, bu barədə Maliyyə Nazirliyinə istinadən məlumat yayılıb.
Bildirilib ki, 2029–2030-cu illərdə neft və əmtəəlik qaz hasilatında yenidən artımın qeydə alınacağı və bunun neft-qaz sektorunda müsbət dinamika yaradacağı proqnozlaşdırılır.
Məlumata görə, 2027-ci ildə əsas kapitala yönəldilən investisiyalar 5,6% artacaq, orta müddətli dövrdə isə bu göstərici üzrə orta illik artım 2,1% təşkil edəcək. Eyni zamanda, 2026–2028-ci illər ərzində neft-qaz sektoruna yönəldilən kapital qoyuluşlarının da artacağı gözlənilir.
Qeyd olunur ki, baza ssenariyə əsasən, cari il üçün 5,5% səviyyəsində proqnozlaşdırılan orta illik inflyasiya tədricən azalaraq 2030-cu ildə 4,6%-ə enəcək.
Proqnozlarda əhalinin gəlir və xərclərinin artımı da əksini tapıb. Belə ki, 2030-cu ildə əhalinin gəlirlərinin 135,4 milyard manata, xərclərinin isə 133,6 milyard manata çatacağı gözlənilir.
Bundan əlavə, 2027–2030-cu illər üzrə manatın ABŞ dollarına qarşı məzənnəsinin sabit qalacağı və hazırkı səviyyədə formalaşacağı bildirilir.
